Премиер, министри, градоначалници, претставници на меѓународни финансиски институции, регулаторни тела, компании, изведувачи...
Почетокот на изградбата на далеководот за енергетско поврзување на Р. Северна Македонија и Р. Албанија како ретко кој настан во изминатиот период предизвика внимание во јавноста, не само поради огромно значење за регионот, туку и како потврда дека инвестициите во инфраструктурата се можни дури и во отежнати услови на пандемија.
Од местото во триаголникот меѓу општините Охрид, Струга и Дебрца каде ќе се гради новата 400/110 kV трансформаторска станица, се пренесоа пораки кои одамна сакаат сите да ги слушнат, а се однесуваат на електроенергетското поврзување на нашата земја со сите соседи , како и на можноста да се обезбеди поголема стабилност, сигурност и доверливост на нашиот електроенергетски систем и вклучување во сите регионални иницијативи за размена на енергија.
Проектот отвора исклучителни економски потенцијали, а присутните како подеднакво важни ги посочија и градењето добрососедски односи, поврзувањето на народите, културниот и социјалниот просперитет. Мапата која што го покажува патот на далноводот е веќе зацртан патоказ, а нејзиното преточување во реалност беше означена со симболичен почеток на бетонирањето и вклучување на градежната механизација. Машините нема да запрат до 2023 година за кога е предвидено завршување на овој проект вреден 50 милиони евра.