Këshilltari ekonomik nga Ambasada e SHBA-ve në Maqedoninë e Veriut, Barnabas Birkeland, së bashku me drejtorin gjeneral të SHA MEPSO, doc. dr. Burim Ljatifi, realizuan një vizitë pune në vendin e ndërtimit të nënstacionit të ri transformator 400/110 kV në Ohër (TS Ohër).
Vizita është pjesë e përpjekjeve për të ndjekur përparimin e ndërlidhjes së parë direkte 400 kV ndërmjet Maqedonisë së Veriut dhe Shqipërisë, e cila përfaqëson një hap të rëndësishëm për zhvillimin dhe përforcimin e bashkëpunimit rajonal, lidhjen e tregjeve, rritjen e stabilitetit të rrjetit dhe furnizimin e sigurt dhe të besueshëm me energji elektrike.
Projekti ka hyrë në një fazë të theksuar të realizimit, me një rritje të konsiderueshme të aktiviteteve ndërtimore që po zhvillohen në një sipërfaqe prej 80.000 m². Aktualisht janë duke u kryer punime montuese në termocentralin 400 kV, si dhe ndërtimi i ndërtesës komanduese, magazinës dhe objekteve për linjat hyrëse dhe dalëse.
Në periudhën e ardhshme, dinamika e realizimit do të duhet të harmonizohet me fillimin e punimeve për linjën e transmetimit 400 kV Bitola – kufiri me Shqipërinë, e cila përfaqëson komponentën e dytë të kësaj ndërlidhjeje.
Me ndërtimin e TS Ohër, Maqedonia e Veriut e forcon pozitën e saj në sistemin elektroenergjetik rajonal, duke siguruar stabilitet më të madh, siguri dhe kushte për lidhjen e kapaciteteve të reja prodhuese nga burimet e ripërtëritshme. Nënstacioni do të mundësojë një lidhje 400 kV dhe tre dalje 110 kV drejt Ohrit, Strugës dhe Resnjës – duke e bërë atë një element kyç për furnizimin me energji elektrike të amvisërive dhe ekonomisë në pjesën perëndimore të vendit.